നീ ഒക്കെ എന്ത് തേങ്ങയാടോ ഈ പറയണേ

meme1.png

1. ഗോവധം നിരോധിക്കണം പശു അമ്മച്ചി ആണ് – പ്രമുഖ ഗോ-ഡാഡി-മമ്മി ഇറച്ചി കയറ്റുമതി മൊതലാളി കം ദേശസ്നേഹി ഓഫ് ഭാരത് മാതാ.

2. വധശിക്ഷ പ്രാകൃതം. നീതിപീഠം ഈ ശിക്ഷാരീതി പുനഃ പരിശോധിക്കണം- ബട്ട് താത്കാലിക സുഖത്തിന്, മൂന്നാം കിട പ്രതികാര രാഷ്ട്രീയത്തിന് വേണ്ടി കൊലപാതകം നടത്തുന്നതിൽ തെറ്റില്ല. – ജയ് കാസ്ട്രോ

3 . കവിത : “കൊള്ളമാണിയോട് പിണക്കമില്ലേ സഖാ കൊല്ലം മുഴുക്കെ നീ കൊല്ലൽ ആണോ ?”

4 . കേരള കോൺഗ്രസ്സ് എന്നും നന്മയുടെ കൂടെ – കരിം കോഴക്കൽ കള്ളൻ മാണി.

5 . റോഡ് ടാറിടണം, നാടിനു വികസനം വരണം, നന്മകൾ എമ്പാടും ചെയ്യണം, ഇതിന്റെ ഒക്കെ കൂടെ ന്റെ സിൽമാ ഒന്ന് വിജയിപ്പിക്കണം – റിലീസ് ഡേറ്റിനു തലേന്ന് മാത്രം പൂക്കുന്ന ഒരു നന്മ മരം .

6 . ധൈര്യം ഉണ്ടേൽ ഒറിജിനൽ ഐ ഡി യിൽ വാ ഡാ. !@##$!%$%# മോനെ – വിശ്വസിക്കുന്ന ശക്തിയുടെയും അങ്ങനെ വിശ്വസിക്കാൻ പറഞ്ഞ മഹാന്റെയും ഫോട്ടോ ഓർ ഐ ഡി ഒരിക്കലും കണ്ടിട്ടില്ലാത്ത, കാണാൻ പാടില്ലാത്ത സമാധാനത്തിന്റെ വെള്ളരിപ്രാവുകൾ.

7. അന്യഭാഷാ ചിത്രങ്ങൾ വൈഡ് റിലീസ് ചെയുക വഴി മലയാളം സിനിമകൾ പിന്തള്ളപ്പെട്ടു പോകുന്നു- എന്നു കബാലിയുടെ കേരളത്തിലെ വിതരണക്കാരൻ പ്രാപഞ്ചിക സ്റ്റാർ .

8 അച്ഛാ ദിൻ വന്നത് എവിടെ ? ബട്ട് എല്ലാം ശരിയാകാൻ കുറെ കൂടെ സമയം എടുക്കും.

9. കേരളം സൊമാലിയ ആണ് -(56 ഇഞ്ച് ) കേരളം ആണ് യഥാർഥ ഇന്ത്യക്കാരുടെ നാട് – (കട്ജു) : ദേർഫോർ സോമാലിയ ആണ് യഥാർഥ ഇന്ത്യ.

10. കത്തിചാവാൻ പോകുന്നവന് എന്തിനാടീ കപ്പടാമീശ ? പിള്ളേരെ എടെടീ …ഓ ഞാൻ അത് മറന്നു- ഫ്രം എമിറേട്സ് വിമാനം .

യു സീ ദി അയൺ ഏണി ഡോണ്ട് യു …!!

ഈ മിണ്ടാട്ടം തുടരാം

4 വർഷങ്ങൾക് ശേഷം,  പൊടി പിടിച്ച, പഴയ ബ്ലോഗിനെ ഒന്ന് നെറ്റിൽ തിരഞ്ഞു.ഭാഗ്യം !! സാധനം അവിടെ തന്നെ ഉണ്ട്.ഇനി സമയം പോലെ എഴുതി തുടങ്ങണം.വിഷയങ്ങൾ ഒരുപാടുണ്ട്.മാറിയ ജീവിത സാഹചര്യങ്ങൾ എഴുത്തും വായനയും ദിനചര്യയിൽ നിന്നും എന്നേ അകറ്റിയിരിക്കുന്നു.മുഷിഞ്ഞ ഐ റ്റീ ജീവിതവും.യാഥാർഥ്യങ്ങൾ തിരിച്ചറിവുകൾ നൽകിയപ്പോൾ വീണുടഞ്ഞ സൗഹൃദങ്ങളും എല്ലാം ഭ്രാന്ത് പിടിപ്പിച്ചുകൊണ്ട് മനസിനെ കീഴ്പ്പെടുത്തിയിരുന്നു.

thought-002

 

4 വര്ഷം കൊണ്ട് എന്റെ ചിന്താഗതിയിൽ വന്ന മാറ്റം എന്നെ തന്നെ അത്ഭുതപ്പെടുത്തുന്നതാണ്. മതക്കുരു ഒരു നിശബ്ദ കൊലയാളിയായി ഉള്ളിൽ ഉണ്ടായിരുന്നു എന്ന തിരിച്ചറിവ്. അന്ധമായ രാഷ്ട്രീയ വിധേയത്വം, അടിമത്തം. എല്ലാം കുറേശെ മാറിവരുന്നു. ചിന്തകൾ സരളവും സ്വതന്ത്രവും ആവുമ്പോൾ ഉള്ള സന്തോഷം ഞാൻ ഇപ്പോൾ അനുഭവിക്കുന്നു. വിശ്വാസ മാറാപ്പുകളെ  എവിടേക്കോ വലിച്ചെറിഞ്ഞു കളഞ്ഞിരിക്കുന്നു. എന്തായിരുന്നു എന്നെ മാറ്റിയത്. അറിയില്ല. ഇനി ഉള്ള എഴുത്തുകൾ സ്വയം തിരിച്ചറിയാൻ വേണ്ടിയും സമൂഹത്തിൽ നിന്നും കിട്ടിയ തിരിച്ചറിവുകൾ നിങ്ങളിലേക്ക് എത്തിക്കാൻ വേണ്ടിയും ആയിരിക്കണം എന്നു ആഗ്രഹിക്കുന്നു.മിണ്ടാട്ടം ഇനി തുടരും..!!!

റിവ്യൂ – റണ്‍ ബേബി റണ്‍ ( സംവിധാനം : ജോഷി )

ഈ ഓണക്കാലത്ത് വളരെയധികം പ്രതീക്ഷയര്‍പ്പിച്ചു പോയിക്കണ്ട ഓരോ ചിത്രങ്ങളും ഒന്നിന് പുറകെ ഒന്നായി നിരാശപ്പെടുത്തികൊണ്ടിരുന്നതിനാല്‍ തീരെ പ്രതീക്ഷയില്ലാതെയാണ് ജോഷിയുടെ ‘റണ്‍ ബേബി റണ്ണിനു ‘ പോയത് . ഫാന്‍സും ഫാമിലിയും ഒരു പോലെ തിങ്ങി നിറഞ്ഞ അന്തരീക്ഷത്തില്‍ കോട്ടയം ‘ആനന്ദി’ലെ ഫസ്റ്റ് ഷോയ്ക്ക് ആണ് കയറിയത് . ഇതേ തിയേറ്ററില്‍ ഇരുന്നുകൊണ്ട് ക്ലാസിക് കൂതറയായ ‘ മിസ്റ്റര്‍ മരുമകന്‍ ‘ കണ്ട ഷോക്ക് മാറി വരുന്നതെയുണ്ടായിരുന്നുള്ളൂ .

ഈ പടം കൂടി പൊട്ടിയാല്‍ ഈ ഓണക്കാലം ഒരു സമ്പൂര്‍ണ സിനിമാ ദുരന്തകാലമാകുമെന്നും താരജാടകള്‍ക്ക് ഒരു താല്‍ക്കാലിക വിരാമമാകുമെന്നും ഞാന്‍ കണക്കുകൂട്ടിക്കൊണ്ടിരുന്നു . ജോഷിയുടെ സമീപകാല പ്രകടനങ്ങളും അത്ര മെച്ചമോന്നുമല്ലായിരുന്നല്ലോ . എന്നാല്‍ ജോഷി എന്നെ ചതിച്ചില്ലെന്നു മാത്രമല്ല , സാമാന്യം കൊള്ളാവുന്ന ഒരു ദൃശ്യാനുഭവം സമ്മാനിക്കുകയും ചെയ്തു . അതെ , ഇത്തവണ ജോഷി എന്നെ ചതിച്ചില്ല ആശാനെ .

സേതുവുമായിട്ടുള്ള കമ്പനി ഉപേക്ഷിച്ചതുകൊണ്ടാണോ എന്നറിയില്ല , തരക്കേടില്ലാത്ത ഒരു തിരക്കഥ ഈ ചിത്രത്തിന് വേണ്ടി എഴുതിയുണ്ടാക്കാന്‍ സച്ചിക്ക് കഴിഞ്ഞിരിക്കുകയാണ് . കഥയോ തിരക്കഥയോ അടുത്തുകൂടി പോലും എത്തിനോക്കാത്ത സമീപകാല കോടാലിപ്പടങ്ങള്‍ വെച്ച് നോക്കുമ്പോള്‍ ഈ തിരക്കഥ പത്തരമാറ്റ്‌ തങ്കമാണെന്ന് വരെ ഞാന്‍ പറഞ്ഞുകളയും . ജോഷി അത് വളരെയധികം മികവോടെ ഫിലിമിലാക്കുകയും ചെയ്തിട്ടുണ്ട് .

സാധാരണ പ്രേക്ഷകന്റെ ആഗ്രഹങ്ങളെ തൃപ്തിപ്പെടുത്തുന്നൊരു കോമഡി -ത്രില്ലര്‍ ചിത്രമൊരുക്കുന്നതില്‍ അദ്ദേഹം നൂറു ശതമാനം വിജയിച്ചിരിക്കുന്നു എന്ന് തന്നെ പറയേണ്ടിവരും . ഈ ചിത്രത്തിലൂടെ ജോഷിയുടെ സംവിധാന മികവ് ഒരിക്കല്‍ കൂടി നാം തിരിച്ചറിയുകയാണ് . മലയാളം ന്യുസ് ചാനലുകളിലും ചാനല്‍ പ്രവര്‍ത്തകര്‍ക്കിടയിലും  നടക്കുന്ന രസകരവും ഉദ്വെഗജനകവുമായ സംഭവങ്ങളെ കഥയുടെ രസച്ചരട് മുറിഞ്ഞു പോവാതെ തന്നെ പ്രേക്ഷകരിലേക്ക് എത്തിക്കാന്‍ ജോഷിക്ക് കഴിഞ്ഞു .

മോഹന്‍ലാല്‍ , അമലപോള്‍ , ബിജുമേനോന്‍ എന്നിവരാണ് ഈ പടത്തിലെ മുഖ്യ കഥാപാത്രങ്ങള്‍ക്ക് ജീവന്‍ നല്‍കിയിരിക്കുന്നത് . മൂവരും അവരവരുടെ ജോലി നന്നായി നിര്‍വഹിച്ചിരിക്കുന്നു എന്ന് പറയാം . ഇവരോടൊപ്പം ഷമ്മി തിലകന്‍ , വിജയരാഘവന്‍ , സിദ്ദിക്ക് , സായികുമാര്‍ , കൃഷ്ണകുമാര്‍ എന്നിവരും അഭിനയിച്ചിരിക്കുന്നു. ലാലേട്ടന്‍ സൂപ്പര്‍ ഹീറോ ഭാരങ്ങളില്ലാതെ (കുറച്ചൊക്കെ ഉണ്ട് ) റോയിട്ടെര്‍സിലെ  ക്യാമറമാന്‍ വേണുവായി  നന്നായി പെര്‍ഫോം ചെയ്യുന്നുണ്ട് . ചുമ്മാ ലാലേട്ടന്റെ അഭിനയപാടവം മാത്രം പൊക്കിയടിച്ചുകൊണ്ട്‌ ഇത് ഒരു ഫാന്‍സ്‌ അസോസിയേഷന്‍ വക റിവ്യൂ ആക്കി മാറ്റാന്‍ ഞാന്‍ ഉദ്യെശിക്കുന്നില്ല . ലാലേട്ടന്‍ പതിവ് പോലെ കൊള്ളാം . പ്രായത്തിനു ചേരുന്ന റോള്‍ തന്നെ . അത്രമാത്രം .

സാധാരണ  സൂപ്പര്‍സ്റ്റാര്‍ പടങ്ങളില്‍ ചുമ്മാ ഒരു കെട്ടുകാഴ്ചയായി മാത്രമാവുന്ന നായികാവേഷങ്ങള്‍ക്ക് ഒരു അപവാദമാണ് ഇതിലെ ന്യുസ് ചാനല്‍ അവതാരക രേണുകയുടെ റോള്‍ . ഈ വേഷം അമലപോളിന്റെ കയ്യില്‍ ഭദ്രമായിരുന്നു . ലാലേട്ടന്റെ കൂടെ സിനിമയില്‍ ഉടനീളം  നില്‍ക്കുന്ന കഥാപാത്രം ആകയാല്‍ ഈ വേഷം പാളിപ്പോയിരുന്നെങ്കില്‍ പടം ബോര്‍ ആയേനെ . എന്നാല്‍ ലാലെട്ടനോട് ഇടിച്ചിടിച്ചു നില്‍ക്കുന്ന പ്രകടനത്തിലൂടെ അമല തന്റെ അഭിനയപാടവവും ഗ്ലാമറും മലയാളത്തിലും വെളിവാക്കിയിരിക്കുകയാണ് . (‘മൈന’യിലൂടെ തമിഴില്‍ നേരത്തെ അഭിനയപാടവം വെളിവാക്കിയതാണ് . ‘വേട്ടൈ’യിലൂടെ ഗ്ലാമറും . ഇതിപ്പോ ഒരു പടത്തില്‍ തന്നെ രണ്ടും . ഹോ .😉 )

ഇവരോടൊപ്പംതന്നെ നില്‍ക്കുന്ന കഥാപാത്രമാണ് ബിജുമേനോന്റെ ഋഷികേശ് . തന്റെ സമീപകാല ചിത്രങ്ങളിലെ മികച്ച പ്രകടനം അദ്ദേഹം ഇവിടെയും ആവര്‍ത്തിച്ചിരിക്കുന്നു എന്ന് പറയാം . പ്രമുഖ ചാനലില്‍ നിന്നും പിരിഞ്ഞ് സ്വന്തമായി ന്യൂസ് ചാനെല്‍ തുടങ്ങി  ഒടുക്കം ജോലിക്കാര്‍ക്ക് ശമ്പളം പോലും കൊടുക്കാന്‍ നിവര്‍ത്തിയില്ലാത്ത അവസ്ഥയില്‍ പെട്ടുപോകുന്ന ഋഷികേശ് ആയി ബിജുമേനോന്‍ തകര്‍ത്തഭിനയിച്ചിരിക്കുകയാണ് . പലപ്പോഴും നികേഷ്കുമാറിനെ ഓര്‍മ്മിപ്പിക്കുകയാണ് ഈ കഥാപാത്രം .  ഈ പടത്തിലെ കോമഡികള്‍ പ്രധാനമായും വരുന്നത് വേണു – ഋഷികേശ് സംഭാഷണങ്ങള്‍ക്കിടയില്‍ ആണ് .

കേട്ടാല്‍ അറയ്ക്കുന്ന കോമഡികള്‍ കുറവാണ് ഈ പടത്തില്‍ . ഒരു സദാചാരപോലിസ് ഭാവത്തില്‍ പടം കണ്ടിരുന്നാല്‍ വേണമെങ്കില്‍ പലതിലും നിലവാരമില്ലായ്മയോ അശ്ലീലമോ ആരോപിക്കാം . അതൊക്കെ നിങ്ങളുടെ ഇഷ്ടം . എന്നെപ്പോലുള്ള സാധാരണ പ്രേക്ഷകര്‍ക്ക്‌ ഇതിലെ തമാശകള്‍ ഇഷ്ടപ്പെടാന്‍ തന്നെയാണ് സാധ്യത . (സുരാജിന്റെ അശ്ലീല കോമഡിയെ ഘോരഘോരം വിമര്‍ശിക്കുന്ന ഞാന്‍ ലാലേട്ടന്റെ പടം വരുമ്പോള്‍ സൈഡുവലിവ് കാണിക്കുന്നു എന്നത് നിങ്ങളെക്കാള്‍ നന്നായി എനിക്കറിയാം . എന്തുചെയ്യാം . ആരാധകനായാലുള്ള ഓരോ പുലിവാലുകളെ..😉 )

കഥസാരം വളരെ ചുരുക്കി പറയുന്നതാണ് നല്ലതെന്ന് തോന്നുന്നു . ഒരു ത്രില്ലറിന്റെ വിശദവിവരങ്ങള്‍ ഇവിടെ എഴുതി സ്പോയില്‍ ചെയ്‌താല്‍ പടം കാണാത്തവര്‍ എന്നോട് പൊറുക്കൂല . അതുകൊണ്ട് രണ്ടുവാക്കില്‍ പറയാം . സിദ്ദിക്ക് – സായികുമാര്‍ ടീം നയിക്കുന്ന  പതിവുവില്ലന്മാരുടെ പതിവ് കലാപരിപാടികള്‍ എക്സ്ക്ലൂസീവ് ആയി ക്യാമറയിലാക്കാന്‍ ശ്രമിച്ചു നടക്കുന്ന വേണുവിനും രേണുകയ്ക്കും , കൂട്ടത്തില്‍ ഋഷികേശിനും കിട്ടുന്ന പണികളും , അതിനവര്‍ കൊടുക്കുന്ന മറുപണികളുമാണ് ഈ ചിത്രത്തിന്‍റെ പ്രമേയം . ഇതെല്ലാം അല്‍പ്പം കൊള്ളാവുന്ന രൂപത്തില്‍ എടുത്തിരിക്കുന്നത് കൊണ്ട് നമുക്ക് തരിമ്പും ബോറടി ഉണ്ടാവില്ലെന്ന് മാത്രം . ചാനല്‍ ആപ്പീസിലും ഇവര്‍ക്കിടയിലും ഉണ്ടാകുന്ന ചില നുറുങ്ങു നര്‍മങ്ങളും കൂടെയുണ്ട് . ഇതിനിടക്ക്‌ ഒരു കല്ലുകടി എന്നോണം ലാല്‍ – അമല പ്രേമലീലകളും മിക്സ് ചെയ്തിട്ടുണ്ട് . (ഇടക്കാല ലാല്‍ – ലക്ഷ്മി റായ് പ്രണയലീലകളെക്കാള്‍ വളരെ വളരെ ഭേദം . ) എല്ലാക്കാലവും എല്ലാപ്പടത്തിലും ലാലേട്ടനെ കൊണ്ട് പ്രേമിപ്പിച്ചേ ഈ സിനിമാക്കാര്‍ അടങ്ങൂ . എന്താ ചെയ്ക .😉

സത്യത്തില്‍ കഥ ,  സംവിധാനം , അഭിനയം എന്നിവയെക്കാള്‍ മികച്ചു നില്‍ക്കുന്നത് ഈ ചിത്രത്തിന്റെ ച്ഛായാഗ്രഹണമാണ്‌ . ക്യാമറമാനായ വേണു നായകന്‍ ആവുന്ന പടത്തിലെ ക്യാമറ മോശം ആകുന്നതെങ്ങനെ അല്ലെ ? ആര്‍. ഡി. രാജശേഖര്‍ നല്ല പണിയറിയാവുന്ന ക്യാമറമാന്‍ തന്നെയാണെന്ന് എനിക്ക് ഈ പടത്തോട് കൂടി മനസ്സിലായി . ഒരു മലയാളം ത്രില്ലര്‍ എന്ന് കേള്‍ക്കുമ്പോള്‍ തന്നെ ‘ നടിയുടെ കൂടെ വെള്ളത്തിലേക്ക് ചാടാന്‍ ‘ തയാറായി നില്‍ക്കുന്ന ക്യാമറയുമായി മെനക്കെടുത്താന്‍ വരുന്ന ക്യാമറമേനോന്മാര്‍ ഇദ്ദേഹത്തിന്റെ അടുത്ത് പോയി പണി പഠിക്കണമെന്ന് അഭ്യര്‍ഥിക്കുകയാണ് . രാത്രി ദൃശ്യങ്ങളും , പാട്ട് സീനും ,  ചാനല്‍ ആപ്പീസിലെ രംഗങ്ങളും എല്ലാം തന്നെ അതിന്റെ മിഴിവോടെ , എന്നാല്‍ ചടുലത നഷ്ടപ്പെടാതെ  അദ്ദേഹം ക്യാമറയില്‍ ആക്കിയിരിക്കുകയാണ് .

ഇനി ഈ പടത്തിലെ സംഗീതത്തെപറ്റി . രതീഷ്‌ വേഗ ലാലേട്ടനെ കൊണ്ട് പാടിച്ച ഒരു പാട്ട് മാത്രമേ ഇതിലുള്ളൂ . വ്യക്തിപരമായി എനിക്ക് അതിഷ്ടപ്പെട്ടില്ലെന്നു മാത്രം . എങ്കിലും കേള്‍ക്കാന്‍ ഒരു വെറൈറ്റി ഒക്കെയുണ്ട് കേട്ടോ . പാട്ടിലെ രംഗങ്ങളും കൊള്ളാം .  ‘ എന്റെ പാട്ട് നിനക്ക് സഹിക്കേണ്ടിവരും ‘ എന്ന് ലാലേട്ടന്‍ നായികയോട് പറഞ്ഞതിന് ശേഷം പാടുന്നതാകയാല്‍ പാട്ടിന്റെ നിലവാരത്തിനു പ്രസക്തിയില്ലാതാവുന്നു എന്ന് കരുതാം . പക്ഷെ , പടത്തിലെ പശ്ചാത്തല സംഗീതം കലക്കി കേട്ടോ . ചെണ്ടയും മോഡേണ്‍ വാദ്യങ്ങളും ഇടകലര്‍ന്നു വരുന്ന സംഗീതം പല രംഗങ്ങളിലേയും ത്രില്ലിംഗ് ഫീല്‍ വര്‍ധിപ്പിക്കാന്‍ തീര്‍ച്ചയായും സഹായകമായിട്ടുണ്ട് .

വിമര്‍ശനത്തിനു വേണ്ടി ഒന്നുകൂടി ചുഴിഞ്ഞു ചിന്തിക്കുമ്പോള്‍ , പല പോരായ്മകളും യുക്തിയില്ലായ്മകളും ചൂണ്ടിക്കാണിക്കാന്‍ തീര്‍ച്ചയായും ഈ പടത്തിലുണ്ട് . അതൊക്കെ ഇപ്പോള്‍ പറഞ്ഞാല്‍ സ്പോയിലെര്‍ ആയിപ്പോവും . എങ്കിലും പടം കണ്ടുകൊണ്ടിരിക്കുമ്പോള്‍ നാം അതൊന്നും ചിന്തിച്ചു പോകില്ല എന്നും ഉറപ്പാണ് . അതാണ്‌ ഈ പടത്തിന്റെ വിജയവും . അതുപോലെ തന്നെ ലാലേട്ടന്റെയും അമലപോളിന്റെയും പ്രണയവും ഒഴിവാക്കാമായിരുന്നു . (എങ്കിലും സഹിക്കാം , ഞാന്‍ ഗ്യാരന്റി . ) സിദ്ദിക്കിന്റെയും സായികുമാറിന്റെയും ടിപ്പിക്കല്‍ വില്ലന്‍ വേഷങ്ങള്‍ ആവര്‍ത്തനവിരസമായി  തോന്നി . അവരുടെ വേഷങ്ങളെ   ഒന്ന് പരിഷ്കരിക്കുക എങ്കിലും ചെയ്യാമായിരുന്നു. പാട്ടിന്റെ കാര്യം ഞാന്‍ നേരത്തെതന്നെ പറഞ്ഞു കഴിഞ്ഞല്ലോ .

അങ്ങനെ മൊത്തത്തില്‍ നോക്കുമ്പോള്‍ ,  ഈ ഓണക്കാലത്ത് ഇറങ്ങിയതില്‍ വെച്ച് കാണാന്‍ കൊള്ളാവുന്ന ഒരു പടം തന്നെയാണ് റണ്‍ ബേബി റണ്‍ എന്ന് പറയാം . ലാലേട്ടനെ ഇഷ്ടപ്പെടുന്നവര്‍ക്കും അല്ലാത്തവര്‍ക്കും കണ്ടിരിക്കാന്‍ പറ്റിയ ഒരു നല്ല പടം .

റേറ്റിംഗ് : 7.5 / 10